Parashikimi i motit: Vranësira dhe mundësi për shi…

Instituti Hidrometeorologjik (IHMK) njofton se sot në territorin e Republikës do të mbajë mot kryesisht me diell, megjithatë do të ketë dhe vranësira të pjesshme.

Gjatë mesditës dhe pasdites pritet që vranësirat konvektive të zhvillohen, duke sjellë në disa zona reshje lokale shiu dhe shkarkesa rrufesh.

Në disa zona të izoluara, sipas IHMK-së, ekziston mundësia e rrebesheve më intensive të shiut, si dhe erëra të fuqishme përkohësisht, ndoshta edhe breshër.

IHMK thekson se reshjet do të kenë karakter lokal dhe nuk do të përfshijnë të gjithë territorin e vendit. Në disa rajone mund të ndodhin stuhira të shkurtra, ndërsa në zona të tjera moti do të mbetet kryesisht i thatë.

“Temperaturat maksimale do të lëvizin nga 31 deri në 33 gradë Celsius. Erërat do të fryjnë kryesisht nga drejtimi i veriperëndimit me intensitet të lehtë deri mesatar, ndërsa pritet të fuqizohen përkohësisht në zonat ku do të zhvillohen proceset stuhore.”, thuhet në njoftim.

Instituti Hidrometeorologjik i Kosovës i inkurajon qytetarët të ndjekin njoftimet dhe përditësimet zyrtare lidhur me motin, si dhe të tregojnë kujdes gjatë aktiviteteve në ambiente të jashtme, sidomos në rast të paraqitjes së bubullimave, erërave të forta apo reshjeve intensive.