MERRNI MASAT: Stuhi e fuqishme pritet ditën e Premte, ja cilat janë zonat më të rrezikuara
Ditën e premte, territori shqiptar do të përballet me stuhi me intensitet të lartë, të cilat do të karakterizohen nga një kohëzgjatje e shkurtër.
Këtë informacion e bëri të ditur meteorologia Tanja Porja përmes një interviste për programin “Dita Jonë” në A2CNN, ku analizoi dinamikën e motit për periudhën në vijim.
Sipas ekspertes, këto dukuri atmosferike do të shfaqen në formën e celulave stuhore që lokalizohen mbi hapësira të caktuara gjeografike, duke ushtruar fuqinë e tyre maksimale pikërisht në ato zona. Megjithëse rreziku është i shtrirë në të gjithë vendin, pjesët qendrore dhe juglindore janë ato ku parashikohet impakti më i rëndësishëm. Porja sqaroi: “Presim edhe sot në territorin shqiptar ndonjë gjë krejt të vogël.
Ditën e premte kemi stuhi afatshkurtra thuajse në gjithë territorin shqiptar. Askush s’mund ta përcaktojë, sepse janë celula që shkëputen, vendosen mbi një lokalitet, dhe aty prodhojnë maksimumin e aktivitetit të tyre. E gjithë Shqipëria është e rrezikuar nga këto stuhi. Për sa i përket hartës së rrezikut, me ngjyrën rozë janë evidentuar zonat qendrore, lindore dhe juglindore, duke përfshirë Tiranën, Durrësin, Fushë-Krujën, Elbasanin, si dhe pjesë të Librazhdit, Pogradecit, Korçës, Ersekës e Devollit, ndërkohë që në listë mund të shtohen edhe Gjirokastra e Përmeti.
Edhe pse i gjithë vendi mbetet i ekspozuar, përparësia e vetme është karakteri kalimtar i stuhive, të cilat për vetëm 20 deri në 40 minuta mund të gjenerojnë reshje të dendura dhe erëra me shpejtësi të konsiderueshme”.
